Unicode ဖြင့်ဖတ်ရန်
၁၉၄၁ ခုနှစ် ဒီဇင်ဘာလ ၇ ရက်နေ့ ထိုနေ့တွင် ဂျပန်ဘုရင့်ရေတပ်သည် ဟာဝါရီကျွန်းစုရှိအမေရိကန် ရေတပ်စစ်ဌာနချုပ်ဖြစ်သည့် ပုလဲဆိပ်ကမ်းအားဗုံးကြဲလိုက်ပြီးနောက် ဒုတိယကမ္ဘာစစ်အတွင်း ဝင်ရောက်တိုက်ခိုက်ခြင်းမရှိသော အမေရိကန်တို့သည် ထိုနှစ် ဒီဇင်ဘာလ ၈ ရက်နေ့တွင် ဂျပန်နိုင်ငံကိုစစ်ကြေငြာပြီးဒုတိယကမ္ဘာစစ်အတွင်းသို့ဝင်ရောက်လာခဲ့လေသည်။ ထို့ကြောင့် ဂျပန်၊ ဂျာမဏီ၊ အီတလီစသော ဝင်ရိုးစွန်းနိုင်ငံများနှင့် အမေရိကန်၊ အင်္ဂလန်တို့ပါဝင်သည့် မဟာမိတ်နိုင်ငံတို့ကတစ်ဖက်ဖြင့် ဒုတိယကမ္ဘာစစ်ကြီးသည် ကမ္ဘာတစ်ခုလုံးသို့အကြီးအကျယ်ပြန့်နှံသွားသည်ဟုဆိုရမည်ဖြစ်ပါသည်။

၁၉၄၁ ခုနှစ် ဒီဇင်ဘာလ ၂၆ ရက်နေ့တွင် ယိုးဒယားနိုင်ငံ၌ ဗမာ့လွတ်မြောက်ရေးတပ်မတော် (BIA) ကိုစတင်ဖွဲ့စည်း၍ ဂျပန်တို့၏အကူအညီနှင့်အတူ မြန်မာနိုင်ငံအတွင်းသို့ဝင်ရောက်တိုက်ခိုက်လေတော့သည်။ ၁၉၄၁ ခုနှစ် ဒီဇင်ဘာလတွင် BIA တပ်တို့နှင့်အတူ ဂျပန်တပ်များက မော်လမြိုင်မြို့ကိုသိမ်းပိုက်ထားလိုက်သည်။ ၎င်းမတိုင်ခင် ဒီဇင်ဘာလ ၁၅ ရက်နေ့ကတည်းကပင် ဂျပန်တို့သည် ကော့သောင်းမြို့ကိုသိမ်းပိုက်ထားပြီး ဖြစ်လေသည်။ 

အမေရိကန်တို့၏ကျားပျံတိုက်လေယာဉ်

ဂျပန်တို့၏မြန်မာနိုင်ငံအတွင်းသို့ ထိုးစစ်နှင့်အတူ ၁၉၄၁ ခုနှစ် ဒီဇင်ဘာတွင် ရန်ကုန်မြို့ မင်္ဂလာဒုံလေတပ်စခန်းဌာနချက်တွင် မဟာမိတ်အမေရိကန်တို့၏ကျားပျံတိုက်လေယာဉ်များရောက်ရှိတပ်စွဲထားလေသည်။ သို့သော် ၁၉၄၁ ခုနှစ် ဒီဇင်ဘာလ ၂၃ ရက်နေ့ နံနက်အစောပိုင်းတွင် ဂျပန်ကြည်းတပ်မတော်ပိုင်လေတပ်ဖွဲ့သည်ရန်ကုန်မြို့အား ဗုံးကြဲတိုက်ခိုက်ရန် ဘန်ကောက်နှင့်အင်ဒိုချိုင်းနားရှိလေယာဉ်ကွင်းတို့မှ ပျံတက်လာခဲ့သည်။ ထိုလေကြောင်းတပ်ဖွဲ့သည် ဗုံးကြဲလေယာဉ် ၈၀၊ တိုက်လေယာဉ် ၃၀ ပါသော လေတပ်အုပ်ကြီးဖြစ်လေသည်။

ထို့နေ့နံနက် ၁၀ နာရီခန့်တွင် မင်္ဂလာဒုံလေတပ်ဌာနချုုပ်မှ ဂျပန်လေယာဉ်များ စစ်ကြောင်းနှစ်ကြောင်းခွဲ၍ ချီတက်လာကြောင်း သတင်းရရှိလေတော့သည်။ ထိုအချိန်တွင် မင်္ဂလာဒုံလေတပ်တွင် မဟာမိတ်တို့၏ လေယာဉ်များ စုစုပေါင်း အစီးရေ (၅၀)ပင်ပြည့်အောင်မရှိ။  မဟာမိတ်တပ်များသည် ရှိသည့်လေယာဉ်များဖြင့် ရန်ကုန်မြို့အားကာကွယ်ရန် ပြင်ဆင်ရလေတော့သည်။

လေကြောင်းတပ်ကြီးချီတက်လာသည်ကို ရန်ကုန်မြို့သူမြို့သားတို့သိရှိလျှင် ယခင်ကဗုံးကြံခံရဖူးသည့် အတွေ့အကြုံမရှိသည့်အပြင် ထိုမျှများပြားသောလေတပ်ကြီးကို မြင်ဖူးခြင်းလည်းမရှိသောကြောင့်  အိမ်ပြင်များသို့ထွက်ကြည့်ကြလေတော့သည်။ ဂျပန်လေယာဉ်များသည် ရန်ကုန်ဆိပ်ကမ်းဘက်အား ဦးစွာဗုံးကြဲချခဲ့ပြီး ထိုမှတစ်ဆင့် စုစုရုံးရုံးဖြင့် လေယာဉ်ထွက်ကြည့်နေကြသော လူနေရပ်ကွက်များဆီသို့ မီးလောင်ဗုံးများ၊ လေယာဉ်တင်ဗုံးများကိုကျဲချသွားလေသည်။ မိမိတို့၏ခေါင်းပေါ်သို့ ဂျပန်ဗုံးများကျလာသည့်အခါမှ ရန်ကုန်လူထုလည်း ထွက်ပြေးရကောင်းမှန်းသိ၍ ခြေဦးတည့်ရာပြေးကြလေတော့သည်။ သို့သော် အရပ်ရှစ်မျက်နှာမှ ပျံဝဲလာကြသည့် ဂျပန်လေယာဉ်တို့မှ ဗုံးများ စက်သေနတ်တို့၏အောက်တွင် ရန်ကုန်လူထုသည်အလူးအလဲခံခဲ့ရသည်။ 

နောက်ထပ် ၄၅ မိနစ်အကြာတွင် ဂျပန်အမှတ် ၆၂ လေတပ်အုပ်သည် ရန်ကုန်မြို့သို့ထပ်မံရောက်ရှိလာပြီး မင်္ဂလာဒုံလေတပ်စခန်းရှိ လေတပ်ကွပ်ကဲရေးစခန်း၊ လေယာဉ်ဂိုထောင်များ၊ ဆီသိုလှောင်ကန်များကို ဗုံးကြဲတိုက်ခိုက်ပြန်ပါသည်။ ဂျပန်များသည် ရန်ကုန်မြို့အား မိနစ်(၂၀)ခန့်စိတ်ကြိုက်ပစ်ခတ်သွားပြီး ပြန်လည်ဆုတ်ခွာသွားပါသည်။ ထိုနေ့တိုက်ပွဲတွင် ဂျပန် အမှတ် ၆၂ လေတပ်မှ လေယာဉ် ၁၀ စီးခန့်သာပျက်စီးသော်လည်း ရန်ကုန်မြို့မှာလုံးဝနီးပါးပျက်စီးသွားပြီး ထိုနေ့တွင် ရန်ကုန်မြို့သူမြို့သား ၂၀၀၀ ခန့်သေဆုံးခဲ့ပြီး ၂၅၀၀ ကျော်ဒဏ်ရာရရှိခဲ့ပါသည်။

ထို့အပြင် ဒီဇင်ဘာ ၂၅ ရက်နေ့တွင် ဂျပန်လေတပ်မှ ရန်ကုန်မြို့အားထပ်မံဗုံးကြဲတိုက်ခိုက်ပြန်ပါသည်။ ထိုအချိန်တွင် မြို့သူမြို့သားများသည် ဂျပန်လေယာဉ်အားကြောက်ရကောင်းမှန်းသိသဖြင့် လေယာဉ်လာကြောင်းသိသည်နှင့်ပုန်းခိုကြတော့သည်။ သို့သော် ထိုနေ့တွင် စနစ်တကျပုန်းခိုစရာနေရာမရှိသဖြင့် ရန်ကုန်မြို့သူ/သား (၇၅၀)ကျော်ထပ်မံသေဆုံး၍ အလုံမြို့လုံးဝပျက်စီးခဲ့ရလေသည်။

ဗုံးကြဲခံရပြီးနောက်ရန်ကုန်မြို့

နောက်ထပ်တစ်ဖန် ၁၉၄၂ ခုနှစ် ဖေဖော်ဝါရီလ ၂၅ ရက်နေ့တွင် ဂျပန်လေတပ်မှလာရောက်ဗုံးကြဲတိုက်ခိုက်ပြန်ပါသည်။ နှစ်လအတွင်း (၃)ကြိမ် ဗုံးကြဲခံရပြီးနောက် ရန်ကုန်လူထုလည်း မြို့ကိုစွန့်ခွာ၍ထွက်ပြေးကြရလေတော့သည်။ ရန်ကုန်မြို့နေကုလားများသည်လည်း အိန္ဒိယကိုခြေကျင်ပြန်ရန် ရန်ကုန်ကိုစွန့်ခွာလာခဲ့တော့သည်။ 

ထိုအချိန်တွင် မော်လမြိုင်မြို့ကိုသိမ်းပိုက်ထားသော ဂျပန်အမှတ် (၁၅)တပ်မသည် စတင်ချီတက်လာပြီဖြစ်သည်။ အိန္ဒိယအမှတ်(၁၇)တပ်မမှ ဂျပန်တို့စစ်တောင်းမြစ်အထိသာချီတက်လာမည်ဟု ခန့်မှန်းထားသော်လည်း ဂျပန်တို့သည် ထိုမှဆက်၍ချီတက်လာခဲ့လေသည်။ 

မဟာမိတ်တို့သည် တောင်ငူတွင်စစ်ဌာနချုပ်အားအခြေစိုက်ပြီး ရန်ကုန်ရှိအင်္ဂလိပ်တပ်များဆုတ်ခွာရန် စီစဉ်တော့သည်။ မြောက်အာဖရိကတွင်နာမည်ရရှိထားသော အမှတ်(၇)တင့်ကားတပ်ကို မြန်မာနိုင်ငံသို့ပြန်လည်ခေါ်ထား ရန်ကုန်အားခုခံရန်နှင့် ရန်ကုန်မြို့အတွင်းရှိတပ်များဆုတ်ခွာရန် အစီအစဉ်များပြုလုပ်လေတော့သည်။ 

၁၉၄၂ ခုနှစ် မတ်လ ၈ ရက်နေ့တွင် ဂျပန်အမှတ်(၂၁၅)ခြေလျှင်တပ်မကြီးနှင့် BIA တပ်များမှ ရန်ကုန်မြို့အား ဝင်ရောက်သိမ်းပိုက်လေတော့သည်။ အင်္ဂလိပ်တပ်များသည် တင့်တပ်ဖွဲ့များကိုအကာအကွယ်ယူရန် ရန်ကုန်မြို့မှစတင်ဆုတ်ခွာတော့သည်။ မဟာမိတ်တို့သည် ဆုတ်ခွာစဉ် သိမ်ကြီးဈေးအပါအဝင် သန်လျင်မြို့ရှိရေနံချက်စက်ရုံများ၊ ရန်ကုန်လျှပ်စစ်ဓာတ်အားပေးစက်ရုံ၊ ရန်ကုန်ဆိပ်ကမ်းများဝန်ချီကရိန်းကြီးများအား ဖောက်ခွဲဖျက်ဆီးသွားခဲ့လေသည်။ ထိုခေတ်ထိုအခါက အာရှတွင်ခေတ်အမီဆုံးမြို့ဖြစ်ခဲ့သည့် ရန်ကုန်မြို့၏ ကောင်းကင်ပြင်သည် ထိုနေ့တွင်နေရောင်ပင်မထိုးနိုင်လောက်အောင် အမှောင်ကြီးကျသည်အထိ တစ်မြို့လုံးနီးပါးမီးလောင်ပျက်စီးသွားလေတော့သည်။ ထို့မတ်လ (၈)ရက်နေ့မှစတင်၍ လေးလကျော်ကြာသည့်တိုင် အင်္ဂလိပ်မဟာမိတ်တပ်များသည် ၎င်းတို့တပ်စွဲထားရာစခန်းများ၊ မြို့များဆီမှ တစ်ဆုတ်တည်းဆုတ်ခွာထွက်ပြေးခဲ့ရ သဖြင့် အင်္ဂလိပ်တို့၏သမိုင်းတွင် ခရီးအကြာဆုံးဆုတ်ခွာခဲ့ရခြင်းဖြစ်လေသည်။

ယခုရန်ကုန်တိုင်းဒေသကြီးတရားလွှတ်တော်အရှေ့တွင် ဂျပန်တပ်များအောင်ပွဲခံနေစဉ်

သက်တံ့နောင်(Wizardry Myanmar)







သက္တံ့ေနာင္(Wizardry Myanmar)